‘ద ఫ్యామిలీ మ్యాన్ 2’ వెబ్ సిరీస్ ఫిల్మ్ ఫేర్ అవార్డుల ఎంపికలో 10 విభాగాల్లో నామినేట్ అయింది. ఈ వెబ్ సిరీస్ లో హీరోయిన్ సమంత విభిన్న పాత్రలో నటించి విమర్శకుల ప్రశంసలు సైతం అందుకుంది. ఈ వెబ్ సిరీస్ అమెజాన్ ప్రైమ్ లో అందుబాటులో ఉంది. ప్రతిభను ప్రోత్సహించే విధంగా ఫిల్మ్‌ఫేర్‌ గతేడాది నుంచి ఓటీటీ అవార్డ్స్‌ అందిస్తోంది. 2021 గానూ ఈ అవార్డ్స్‌ కు నామినేట్ అయిన సిరీస్ ల జాబితాను ఫిల్మ్‌ఫేర్‌ ఇటీవల ప్రకటించింది. ఈ మేరకు 2020 ఆగస్టు 1 నుంచి 2021 జులై 31 మధ్య విడుదలై, విశేష ప్రేక్షకాదరణ పొందిన వాటిని ఎంపిక చేసినట్లు నిర్వహకులు వెల్లడించారు.
‘ద ఫ్యామిలీ మ్యాన్ 2′.. పది విభాగాల్లో నామినేట్ అయింది. బెస్ట్‌ సిరీస్, బెస్ట్‌ డైరెక్టర్‌ (రాజ్‌ అండ్‌ డీకే, సుపర్న్‌ ఎస్‌. వర్మ), బెస్ట్‌ యాక్టర్‌ – మేల్‌ (మనోజ్‌ బాజ్‌ పాయ్‌), బెస్ట్‌ యాక్టర్‌ – ఫిమేల్‌ (సమంత), బెస్ట్‌ సపోర్టింగ్‌ యాక్టర్‌- ఫిమేల్‌ (ఆశ్లేషా ఠాకూర్‌), బెస్ట్‌ సపోర్టింగ్‌ యాక్టర్‌ -మేల్‌ (షరిబ్‌ హష్మి), (సన్నీ హిందూజ), బెస్ట్‌ ఒరిజినల్‌ స్టోరీ (సుమన్‌ కుమార్‌, రాజ్‌ అండ్‌ డీకే), బెస్ట్‌ డైలాగ్స్‌ (సుపర్న్‌ ఎస్‌ వర్మ, సుమన్‌ కుమార్‌, రాజ్‌ అండ్‌ డీకే, మనోజ్‌ కలైవనన్‌), బెస్ట్‌ ఒరిజినల్‌ స్క్రీన్‌ప్లే (సుమన్‌ కుమార్‌, రాజ్‌ అండ్‌ డీకే, సుపర్న్‌ ఎస్‌. వర్మ) కేటగిరీల్లో ఈ సిరీస్ హవా కొనసాగించింది. ప్రేక్షకులు తమకు నచ్చిన సిరీస్ కు ఓటు వేసేందుకు ఫిల్మ్‌ఫేర్‌ వెబ్‌సైట్‌ ద్వారా ఈనెల 24 వరకు, యాప్‌ ద్వారా ఈనెల 28 వరకు నిర్వాహకులు అవకాశం కల్పించారు.
