మా’ ఎన్నిక‌ల్లో తాను స‌పోర్ట్‌ చేసిన ప్రకాశ్రాజ్ ఓడిపోవ‌డంతో మెగా బ్రదర్ నాగబాబు సంచలన నిర్ణయం తీసుకున్నారు. ప్రాంతీయ వాదం మరియు సంకుచిత మనస్తత్వంతో కొట్టు మిట్టాడుతున్న మూవీ ఆర్టిస్ట్ అసోసియేషన్ లో కొనసాగడం ఇష్టం లేక మా అసోసియేషన్ లో తన ప్రాథమిక సభ్యత్వానికి రాజీనామా చేస్తున్నట్లు నాగబాబు సోషల్ మీడియా ద్వారా వెల్లడించారు.
తన రాజీనామాను మా అసోసియేషన్ కి 48 గంటల్లో తన స్టాఫ్ ద్వారా పంపుతానని నాగబాబు తెలిపారు. ఇది ఎంతో ఆలోచించి, ప్రలోభాలకు అతీతంగా పూర్తి చిత్తశుద్దితో తీసుకున్న నిర్ణయం అని చెప్పారు. ఆదివారం జరిగిన ‘మా’ ఎన్నిక‌ల్లో మంచు విష్ణు 107 ఓట్ల మెజారిటీతో తన ప్రత్యర్థి ప్రకాశ్రాజ్ పై గెలుపొందారు. ప్రెసిడెంట్‌ గా మంచు విష్ణు, ఎగ్జిక్యూటివ్‌ వైస్‌ ప్రెసిడెంట్‌ గా శ్రీకాంత్, జనరల్‌ సెక్రటరీగా రఘుబాబు, ట్రెజరర్‌ గా శివబాలాజీ ఎన్నికయ్యారు.
