దేశీయ టెలికాం రంగంలో పెను సంచలనం సృష్టించిన జియో.. ఇప్పుడు స్మార్ట్‌ ఫోన్ రంగంలోకి అడుగుపెట్టింది. ప్రపంచంలోనే అతి తక్కువ ధరకే స్మార్ట్‌ ఫోన్ ను అందుబాటులోకి తెస్తామని ప్రకటించి ఇప్పటికే ఆసక్తి రేకెత్తించింది. తక్కువ ధరకే వస్తుంది కదా.. దాని క్వాలిటీ కూడా అంతంత మాత్రంగానే ఉంటుంది అనుకుంటే.. పప్పులో కాలేసినట్లేనని చెబుతోంది. ప్రస్తుతం మార్కెట్లో ఉన్న ఏ స్మార్ట్‌ ఫోన్ కీ తీసిపోని ఫీచర్స్‌ తో అతి తక్కువ ధరకే ఈ ఫోన్ ను అందిస్తామని ప్రకటించింది. ఈ క్రమంలో.. నేటి నుంచే అమ్మకాలను కూడా మొదలెట్టింది జియో. అయితే.. ఈ ఫోన్ ను నేరుగా షాప్‌ కు వెళ్లి కొనడం వీలుపడదు. ఇందుకు ముందస్తు రిజిస్ట్రేషన్ తప్పనిసరి.
ఫోన్ కొనాలనుకునేవారు స్టోర్‌ కు వెళ్లడానికి ముందుగా వాట్సాప్ ద్వారా లేదా కంపెనీ వెబ్‌ సైట్ (https://www.jio.com/next) ద్వారా నమోదు చేసుకోవాలి. వాట్సాప్ ద్వారా రిజిస్ట్రేషన్ కోసం 7018270182కు Hi అని మెసేజ్ చేయాలి. రిజిస్ట్రేషన్ ప్రాసెస్ కోసం వినియోగదారులు తమ లొకేషన్‌ ను షేర్ చేయాల్సి ఉంటుంది. అది పూర్తయిన తర్వాత స్టోర్‌ కు వెళ్లి జియో ఫోన్ నెక్ట్స్ కొనుక్కోవాల్సిందిగా వినియోగదారులకు సమాచారం వస్తుంది. ఒకటి లేదా రెండు రోజుల తర్వాత రావాల్సిందిగా చెప్పే అవకాశం ఉంది. జియో ఫోన్ నెక్ట్స్‌కు సులభ యాక్సెస్ ఉండేందుకు వీలుగా దేశవ్యాప్తంగా కంపెనీ 30 వేలకు పైగా రిటైల్ అవుట్ లెట్స్‌ తో భాగస్వామ్యం కుదుర్చుకుంది.
జియో ఫోన్ నెక్ట్స్ అసలు ధర రూ.6,499. ఈ మొత్తాన్ని ఒకే సారి చెల్లించలేని వారి కోసం రిలయన్స్.. ఈఎంఐ ప్లాన్‌ లను విడుదల చేసింది. ఇందులో వినియోగదారులు మొదటగా రూ.1,999 చెల్లించాలి. అందుకు అదనంగా రూ.501 ప్రాసెసింగ్ ఫీజు ఉంటుంది. మిగిలిన మొత్తాన్ని నెలవారీ వాయిదాల్లో చెల్లించవచ్చు. ఇందుకోసం పేపర్‌ లెస్ డిజిటల్ ఫైనాన్స్ ఆప్షన్‌ ను కూడా కంపెనీ అందుబాటులోకి తీసుకు వచ్చింది.
ఈ జియో ఫోన్ ప్రగతి ఆపరేటింగ్ సిస్టమ్‌పై పని చేస్తుంది. భారతదేశం కోసం తయారు చేసిన ఆండ్రాయిడ్ ఆప్టిమైజ్డ్ వెర్షన్. ఇది 5.45 అంగుళాల హెచ్‌డి+ (720×1,440 pixels) డిస్‌ప్లేను కలిగి ఉంటుంది. కార్నింగ్ గొరిల్లా గ్లాస్ 3 రక్షణతో వస్తుంది. యాంటీ ఫింగర్ ప్రింట్ కోటింగ్ ఉంటుంది. కెమెరా విభాగంలో జియో ఫోన్ నెక్ట్స్ 13 మెగా పిక్సెల్ రియర్ కెమెరాను, 8-మెగా పిక్సెల్ సెల్ఫీ కెమెరాను కలిగి ఉంటుంది. రియర్ కెమెరాలో పోట్రాయిట్ మోడ్, నైట్ మోడ్, ప్రీలోడెడ్ కస్టమ్ ఇండియా- అగుమెంటెడ్ రియాలిటీ ఫిల్టర్స్ ఉంటాయి. ఈ ఫోన్ 1.3 GHz క్వాల్ కామ్ స్నాప్ డ్రాగన్ 215 క్వాడ్ – కోర్ ప్రాసెసర్, 2 జీబీ ర్యామ్, 512 జీబీ వరకు విస్తరించుకోగలిగిన 32 జీబీ ఇంటర్నల్ స్టోరేజ్‌ను కలిగి ఉంటుంది. ఈ ఫోన్ 3,500 ఎంఏహెచ్ బ్యాటరీని కలిగి ఉంటుంది. మైక్రో యూఎస్బీ పోర్ట్, 3.5 ఎంఎం ఆడియో జాక్, బ్లూటూత్ వీ4.1, వై-ఫై, డ్యూయల్ సిమ్ నానో స్లాట్స్ ఉంటాయి. జియో ఫోన్ నెక్ట్స్ ఆటోమేటిక్ సాఫ్ట్ వేర్ అప్ గ్రేడ్స్‌ను పొందుతుంది. రీడ్ అలౌడ్, లైవ్ ట్రాన్స్ లేట్, గూగుల్ అసిస్టెంట్ సపోర్ట్ ఉంటాయి.
