దర్శకధీరుడు రాజమౌళి అత్యంత ప్రతిష్టాత్మకంగా తెరకెక్కిస్తున్న చిత్రం ‘ఆర్ఆర్ఆర్’. ఇంకా రెండు పాటల షూటింగ్ మాత్రమే మిగిలి ఉంది. ఒకవైపు పోస్ట్ ప్రొడక్షన్ పనులు చేస్తూనే మరోవైపు పాటలను పూర్తి చేసే పనిలో ఉన్నాడు జక్కన్న. ఈ రెండు పాటలు మూవీలో చాలా ప్రత్యేకమని సమాచారం. హైదరాబాద్ లో వేసిన భారీ సెట్స్ లో సాంగ్స్ షూటింగ్ జరుగుతుంది. ఇందులో ఒక సాంగ్ ని కేవలం మూవీ ప్రమోషన్ కోసం ప్లాన్ చేశారట. అయితే ఈ సినిమాకి సంగీతం అందిస్తున్న కీరవాణితో కాకుండా టాలెంటెడ్ తమిళ మ్యూజిక్ డైరెక్టర్ అనిరుధ్ రవిచంద్రన్ తో ప్రమోషనల్ సాంగ్ ని కంపోజ్ చేయిస్తున్నారని తెలుస్తోంది.
అంతేనా… ఈ సాంగ్ కి మరో ప్రత్యేకత కూడా ఉందండోయ్. ఇందులో రాజమౌళి గత చిత్రాల హీరోలైన ప్రభాస్, రవితేజ, నాని, సునీల్, నితిన్ లు కూడా కనిపించబోతున్నారు. ఎన్టీఆర్, రామ్ చరణ్ లతో ఈ హీరోలు ఒకేసారి స్క్రీన్ మీద కనిపిస్తే ఫ్యాన్స్ కి కన్నుల పండగే. బాహుబలి లాంటి భారీ హిట్ తర్వాత జక్కన్న నుండి వస్తున్న ఈ మూవీ మీద దేశ వ్యాప్తంగా భారీగా అంచనాలు నెలకొన్నాయి. ఇప్పటికే జక్కన్న ప్రమోషన్స్ మొదలెట్టి మరింత హైప్ పెంచుతున్నారు. వచ్చే ఏడాది జనవరి నెలలో ఆర్ఆర్ఆర్ మూవీని విడుదల చేసేందుకు రాజమౌళి టీం సన్నాహాలు చేస్తున్నారని తెలుస్తుంది.
