వర్షాకాలం వర్షాలతో పాటు జబ్బులను కుడా తెచ్చే కాలం. ఈ కాలంలో వాతావరణ మార్పుల వల్ల వచ్చే జలుబు, దగ్గు ముందు గొంతులో మంట నుండే మొదలవుతాయి. ఈ గొంతులో మంటని తగ్గించుకోవడానికి ఇంటి చిట్కాలు ఎంతో ప్రభావవంతంగా పనిచేస్తాయి. మరి ఆ చిట్కాలేమిటో చూసేద్దామా..
1. ఉప్పు నీటితో పుక్కిలి పట్టడం..
ఉప్పు యాంటీ సెప్టిక్‌గా పని చేస్తుంది. ఇది ఇన్‌ఫ్లమేషన్‌, ఇన్‌ఫెక్షన్‌నీ కూడా తగ్గిస్తుంది. ఒక గ్లాసు గోరు వెచ్చని నీటిలో అర టీ స్పూన్ ఉప్పు వేసి పుక్కిలి పట్టండి. ఇలా రోజులు చాలా సార్లే చేయవచ్చు.
2. తేనె తీసుకోవడం..
తేనెలో యాంటీ ఆక్సిడెంట్, యాంటీ మైక్రోబియల్ ప్రాపర్టీస్ ఉన్నాయి. రాత్రి నిద్రకి ముందు అర టీ స్పూన్ తేనె తాగండి. అయితే, సంవత్సరం కంటే చిన్న వయసున్న పిల్లలకి మాత్రం తేనె ఇవ్వకూడదని గుర్తు పెట్టుకోండి.
3. హెర్బల్ టీ..
గ్రీన్ టీ, లవంగాల టీ, అల్లం టీ వంటి టీలు ఈ సమస్యని బాగా తగ్గిస్తాయి. పెప్పర్మింట్ టీ, చామోమిల్ టీ, రాస్ప్‌బెర్రీ టీ కూడా బాగా పని చేస్తాయి. అయితే, హెర్బల్ టీలు తాగే ముందు మాత్రం మీ డాక్టర్‌ని కన్సల్ట్ చేయడం అవసరం.
4. యూకలిప్టస్ ఆయిల్..
ఒక గిన్నెలో వేడి నీరు పోసి అందులో కొన్ని చుక్కల యూకలిప్టస్ ఆయిల్ వేయండి. మీ తలని ఒక టవల్ తో కవర్ చేసుకుని, ఆ గిన్నె మీదకి వంగి ఆ ఆవిరిని పీల్చండి. ఇలా చేసేప్పుడు ఆ వేడి నీటి గిన్నె మీ మీద పడిపోకుండా జాగ్రత్త తీసుకోండి. ఎలెక్ట్రిక్ స్టీం ఇన్‌హేలర్ లో కూడా యూకలిప్టస్ ఎస్సెన్షియల్ ఆయిల్ కలపవచ్చు. ఈ ఎస్సెన్షియల్ ఆయిల్స్‌ని డైల్యూటెడ్ ఫార్మ్‌లో మాత్రమే వాడాలి, అది కూడా మీ డాక్టర్‌ని కన్సల్ట్ చేసిన తరువాతే.
5. చికెన్ సూప్..
చికెన్ సూప్ తీసుకోవడం వల్ల ఇమ్యూనిటీ పెరుగుతుంది, ఇన్‌ఫెక్షన్స్‌తో పోరాడే శక్తి వస్తుంది, సైనస్ మరియు నాసల్ ప్యాసేజ్ క్లియర్ అవుతాయి. అయితే, ఇందుకు ఇంట్లో చేసిన చికెన్ సూప్ మాత్రమే వాడాలి.
6. యాపిల్ సిడార్ వెనిగర్..
ఒక గ్లాసు నీటిలో కొద్దిగా యాపిల్ సిడార్ వెనిగర్ కలిపి తాగవచ్చు, లేదా యాపిల్ సిడార్ వెనిగర్‌తో గార్గ్లింగ్ చేయవచ్చు. యాపిల్ సిడార్ వెనిగర్‌ని ఎప్పుడు వాడినా డైల్యూట్ చేసి మాత్రమే వాడాలని గుర్తు పెట్టుకోండి.
7. నిమ్మకాయతో..
యాలకులు, లవంగాలు, దాల్చిన చెక్క, తాజా నిమ్మకాయ, కోసి కొద్దిగా కాల్చిన నిమ్మ చెక్క వేడి నీటిలో కాసేపు ఉంచి, ఆ నీటిని తాగేయండి.
8. గోరు వెచ్చగా..
గోరు వెచ్చని నీటిలో మెత్తని బట్ట ముంచి పిండేయండి. నీరు మరీ వేడిగా లేకుండా చూసుకోండి. ఈ బట్టని మెడ మీద కొన్ని నిమిషాల పాటూ ఈ బట్టని ఉంచుకోండి.
