అది ఐక్యరాజ్య సమితి (ఐరాస) సమావేశం జరుగుతున్న మందిరం. ఈ సర్వసభ్య సమావేశానికి అనుకోకుండా అనూహ్య అతిథి హాజరైంది. ఐరాస జనరల్ అసెంబ్లీలో జరిగే కావెర్ నోస్ హాల్ లోకి డైనోసార్ నడుచుకుంటూ వచ్చింది. దీంతో ఆ సమావేశంలో పాల్గొన్న ప్రపంచ నేతలు, పలు దేశాల దౌత్యవేత్తలు ఉలిక్కిపడ్డారు. అక్కడి నుంచి నేరుగా పోడియం వద్దకు వెళ్లిన ఆ డైనోసార్ మానవాళిని ఉద్దేశించి ప్రసంగించింది. ఈ సందర్భంగా ప్రపంచంలో చోటుచేసుకుంటున్న వాతావరణ మార్పులపై తీవ్ర ఆవేదన వ్యక్తం చేసిన ఆ జీవి.. వినాశనాన్ని ఎంచుకోకండి… మానవజాతిని కాపాడుకోండి అంటూ విజప్తి చేసింది.
ప్రజలారా వినండి! మీరంతా పర్యావరణ విపత్తు దిశగా అడుగులేస్తున్నారు. ప్రతి సంవత్సరం అన్ని ప్రభుత్వాలు లక్షలాది కోట్ల ప్రజాధనాన్ని శిలాజ ఇంధనాల సబ్సిడీ కోసం ఖర్చు చేస్తున్నాయి. ప్రపంచ వ్యాప్తంగా కోట్లాది మంది పేదరికంలో జీవిస్తున్నారు. ఆకలితో అలమటిస్తున్నారు. వినాశనంపై ఖర్చు చేయడానికి బదులు.. ఇలాంటి పేదలకు సాయం చేస్తే బాగుంటుందని అపించలేదా? మీ అంతం కోసం మీరే డబ్బులు ఖర్చు చేసుకుంటారా? ఇప్పటికైనా మించిపోయింది లేదు.
మహమ్మారి నుంచి కోలుకుంటూ ఇప్పుడిప్పుడే మీ ఆర్థిక వ్యవస్థలను పటిష్ఠం చేసుకుంటున్నారు. కాబట్టి మీకిదే నేనిచ్చే ఓ మంచి సలహా. మీ అంతాన్ని మీరే కోరుకోకండి. సమయం మించిపోకముందే మిమ్మల్ని మీరు కాపాడుకోండి. ఇప్పటికైనా మార్పులను ఆహ్వానించండి.. మారండి. దాని నుంచి తప్పుకునేందుకు వంకలు వెతుక్కోవద్దు. థాంక్యూ అంటూ ఆ డైనోసార్ తన ప్రసంగాన్ని ముగించేసింది. అంతే… హాలంతా చప్పట్లతో మార్మోగిపోయింది.
అయితే ఇది నిజంగా జరగలేదు. వాతావరణ మార్పులపై ప్రపంచానికి అవగాహన కల్పించేందుకు ఐక్యరాజ్యసమితి డెవలప్ మెంట్ ప్రోగ్రామ్ చేసిన మాయ ఇది. పర్యావరణ మార్పులపై ఐరాసలో సమావేశం జరగనున్న నేపథ్యంలో యూఎన్ డీపీ.. ఈ షార్ట్ ఫిల్మ్ ను రూపొందించింది. గ్రాఫిక్స్ లో డిజైన్ చేసిన ఈ వీడియోలో డైనోసర్ కు వివిధ దేశాలకు చెందిన సెలబ్రిటీలు గాత్రం అందించారు. ఈ వీడియోను ఐరాస తన ట్విటర్ ఖాతాలో షేర్ చేయగా.. విపరీతమైన ఆదరణ లభించింది. డైనోసార్ నిజంగా వచ్చి మాట్లాడినట్లుగా చూపించడం విశేషం.
We can no longer ignore the climate crisis.
It's time to stop making excuses and start making changes!
Let's take #ClimateAction before it’s too late: https://t.co/UaBpA8VLbn
via @UNDP #DontChooseExtinction pic.twitter.com/y2zZsSc0lB— United Nations (@UN) October 27, 2021
