నేచురల్ స్టార్ నాని హీరోగా రీతూవర్మ, ఐశ్వర్య రాజేష్‌ హీరోయిన్లు గా తెరకెక్కుతున్న చిత్రం ‘టక్ జగదీష్’. ఈ చిత్రానికి శివ నిర్వాణ దర్శకత్వం వహించిగా సాహు గారపాటి, హరీష్‌ పెద్ది నిర్మించారు. తాజా గా ‘టక్ జగదీష్’ సినిమా ఓటీటీ విడుదలకు రంగం సిద్ధమైనట్లు తెలుస్తోంది. ఇందుకోసం అమెజాన్ ప్రైమ్ తో భారీ డీల్ కుదుర్చుకుందట చిత్రబృందం. త్వరలోనే అధికారిక ప్రకటన రానుంది. రూ. 37 కోట్లకు డీల్ కుదిరినట్టు సమాచారం. త్వరలోనే చిత్రబృందం అధికారికంగా ప్రకటించే అవకాశాలున్నాయి. శాటిలైట్‌, హిందీ అనువాద హక్కులు కలుపుకొంటే రూ.50 కోట్లపైగానే ఈ సినిమా వ్యాపారం చేసినట్టవుతుందని సినీ వర్గాలు లెక్కగడుతున్నాయి. ఈ సినిమాలో నాజర్, జగపతి బాబు, రావు రమేష్‌, వీకే నరేష్‌, డానియల్ బాలాజీ, తిరువీర్, రోహిణి, దేవదర్శిని, ప్రవీణ్ ముఖ్య పాత్రలు పోషించారు.
ఒక వైపు కరోనా భయాలు.. మరోవైపు ప్రదర్శన రంగంలో సమస్యలు.. ఫలితంగా చిత్రసీమ ఉక్కిరిబిక్కిరవుతోంది. రూ.కోట్లు ఖర్చు పెట్టి తీసిన సినిమాల్ని విడుదల చేసుకోలేని పరిస్థితి. ధైర్యం చేసి విడుదల చేసినా ప్రేక్షకుల నుంచి వస్తున్న స్పందన చాలడం లేదు. పైగా ఆంధ్రప్రదేశ్‌ లో రాత్రి కర్ఫ్యూ, 50శాతం సామర్థ్యంతో ప్రదర్శనలు ఇబ్బందికరంగా మారుతున్నాయి. ఈ నేపథ్యంలో గత వారం విడుదలైన సినిమాలు అంతంత మాత్రం ఫలితాల్ని రాబట్టాయి. చాలా చోట్ల థియేటర్లు ప్రేక్షకులు లేక వెలవెలబోయాయి. దీంతో చాలామంది నిర్మాతలు భారం దించుకోవాలనే ప్రయత్నాల్లో ఉన్నారు. దీంతో ఓటీటీలో విడుదల చేయడంపై మొగ్గు చూపుతున్నారు.
